Athak Nuntakna (Matthew 16:13-24) ~ Pastor Ai Lian Pau

`Athak Nuntakna (Matthew 16:13-24) ~ Pastor Ai Lian Pau

A Thak Nuntakna ~ Pastor Ai Lian Pau

A Thak Nuntakna ~ Pastor Ai Lian Pau

I biak Pasian pen thu dot a uuk Pasian hi. Dotna nei zelzel hi. Piancil pek panin dotna tawh kipanin “Adam, koi ah om na hi hiam?” ci hi. Adam khit ciangin a tapa ahi, Kain tungah zong “na sanggampa koi ah om a hiam?” ci-in dongh hi. Sim behbeh le hang, i biak Pasian pen thu dot a uuk Pasian ahih lam kimu thei hi. Ei pen, Sangkah ding bel ut in, ahih hang laivuan ding khawng a ut se lote hi hangh. Pawlkhat bang hi leh “Sangkah hoih hi, hih Sang hoih hi,” cih danin gentheizel uh hi. Ahih hangin, “laivuanna a omlo Sang hi leh naak hoih zawk ding hi ven!,” cih danin gen thei hi hangh. I kahnop tintan te pen, laivuanna a omlo tintante khawng na hi thei zaw hi. Ahih hangin thu-um mi taktak khat i hih nading laivuan bel tuakkha veve ding hi hangh. Banghang hiam? Laivuan in ei ii dinmun a sanzawkna ah hong khantoh nadingin laivuanna kinei ahi hi. Ei’ theih loh thute pholaak nadingin hong kidong hi loin, i theih khit thute hong kisittel kik nading, kawlpau-in gen le hang, hoih mahmah in “a tan tin sar may pwe” ci-in kisam hi. I laitaan hong kikhan nadingin a kibawl laivuan hi.

Tuabang mahin den-a i sim Matthew 16:13 ah, Jesuh in a nungzuite dotna na nei a, “mite in Kei bang hong ci muh uh hiam, mite in Kei’ thu bang gen uh hiam,” cih danin dong a, nung zuite in zong “mite in Nang pen Elijah hi teh, Kamsangpa Jeremiah hi teh; pawl khat in Tuiphum pa Johan sihna pan hong thokik hi, ci-in hong gen uh hi” cih danin dawng uh hi. Tua tengah Zeisu in a theihnop thu pen, mite in bang hongci gen uh hiam? cih hi loin, no e leh, Kei hong bangci muh na hi uh hiam? cihna hizaw hi. Tua pen tuni-in eite zong, ei leh ei i kidot ding dotna ahi hi. 2018 ah i kalsuan ciangin Pasian tawh i kimuh ciang, na i sep ciang, nuntak tawntungna ah Pasian in “nang e, Kei kuain hong mu na hi hiam? ci-in hong dongh hi. Tua Topa Zeisu thudotna pen nungzuite in a dawn khit ciangin Peter in dawng a, “Topa, Nang pen a nungta Pasian ii Tapa na hihi. Messiah na hihi,” ci hi. Tua a cihna pen Khrih ii pianna taktak genna a hih manin Khrih Zeisu nuam mahmah hi.

Johan 20:30 i sim ciangin Lai Siangtho ki-atna ii ngimna pen, Zeisu Khrih hi-in, Khrih pen Lai Siangtho lui sungah Messiah ci-in ki thei a, Amah pen Pasian’ Tapa hi, ci-in kithei hi. Tua thu i tel nading, i theih nading, i sanzawh nading pen Lai Siangtho a ki-atna ahang ah ihi. Tua dawnna azak ciangin Zeisu nuam mahmah hi. Tua dawnna pen ei thu aa i theih hi loin, Pasian in hong theihsak ciangin kithei zo pan hi. Aban ah i sim beh ciangin, Khrih in Jerusalem khuapi a pai nading thu, Lai Siangtho siamte (lai theite) hangin a kithat ding thu leh, nithum khit ciangin thokik ding cihte gen hi. Tua ciangin Peter in “Topa aw, tua bang thusia Nang’ tungah tung kei ta hen,” ci hi. Kawlpau-in hi leh “ဖြဲ႕ဟဲ့၊ လြဲပါေစ လြဲပါေစ” “hih bang thu tawh kipelh hen, kipelh ta peuh hen,” ci-in gen hi. B.Th kakah lai-un ka lawm khat om a, khatvei an ka nekkhop uh leh, a sikkeu pen mehkuang tawh kinawtkha hi. Tua ciangin amah’n a meh tuite pen sikkeu tawh lawk hi. “Bang hih nahi hiam?” ka cih uh leh, lengla hong paikha leh a kipelhna dingin abawl ka hi hi,” ci hi. I zatdan leh i tatdan ngeinate bel a tuamtek hiding hi. Tuabang mahin Peter in zong “kipelh ta hen! Topa, hih dan thute Nang’ tungah hong tungkei ta hen,” ci hi. A masa in matdim (full mark) angah Peter pen tua hun ciangin bem (0) bek ngahta hi.

Zeisu in bangci genkik hiam cih leh, “ka gal pa aw, Kei’ kiang pan kihemkhia in,” ci hi. Lai Siangtho Zolai leh Manglai ah bel “Satan aw” ciin na gen hi. Satan a cihna a thu pen, Sangmang pa Judson in tang takin lai letna na bawl hi. Satan a cihna ah “ka galpa” a cihna hi a, Pasian’ langpang leh Pasian’ deihna pan pialna cihna hi-in, Satan a cihna sangin, galpa ci-in a nazang hizaw hi. “Pasian’ deihna bangin ahih nuamlo ka gal pa aw, Kei’ kiang pan paikhia in; Nang pen kei adinga a nawngkai, hong puksak thei na hi ta hi. Tunglam lunggulh loin, mihing’ deihna na lunggulh hi,” ci hi. Peter laivuanna ah kia hi. A masa aa bel mark 100 ngah in, a nihveina ciangin mark bem (0) bek ngah hi. Thu-um Nu le Pa, U le Naute aw, i nisim nuntakna ah i biak Pasian pen a thakthak pulaaknate i neih ding ki sam hi. Banghang hiam? Banghang i hih ding kisam hiam? Tuni-in Peter’ nuntakna tawh kisai-in tha i laak ding kisam hi.

Inn ah ka Nu ii a lawm khat pen kum khat-in nih vei bang hong hawh thei hi. Hong hawh ciangin amau Pasian thu kikum theizel uh hi. Pasian bangzah takin hoih hiam? cih dante kikum in teci pannate neikhawm theizel uh hi. A beisa kum thum, kum li lai pawl hong pai khat in, “tua Pasian a um taktak te, gupkhiatna taktak a ngah tua nu, tua pa pen cina lo ding hi. Natna cinatna cihte omlo hi. Cidam lo pahpahte pen gupkhiatna a ngah taktak lote hi,” cih bangin ka Nu kuppih a, tua khit kha 6 khit ciangin a pau’ dan hong kikhel hi. Ei thu-um mi, Khristiante’ nuntakna cih pen paakhuan bang hilo a, Gethsemane huan sung mah bangin i dawn nop loh, i pulaak nop lohte zong pulaak kul ding hi. Khrih dan mah bangin Singlamteh lampi izuihkul ding hi, cih danin a pau’ dan hong kikhelta hi. Tua zawh kha 6 ahihkeileh, kum khat pawl ciangin hong hawhkik leuleu hi. Ka Nu tawh kikumkum uh a, ei thu-um mite pen Pasian in a gualzote hong piangsak nuam hi. A meidawi dingin Pasian in hong bawl hilo a, a lutang, a makai dingin Pasian in hong bawl hi. Tua danin hong teelsa hi, ci-in ka Nu kuppih hi. Hih danin ngaihsun le hang, ama upna pen zanni a tuam khat, tuni a tuam khat cih danin kingaihsun kha thei a, a bangdanpi hiam, cih bangin kingaihsun kha thei hi. Ahih hang, a taktakin hih pen Khristian nuntakna ahi hi.

A khatna aa thu pen, i biak Pasian in anungta Pasian ahih man hi. Nuntakna anei lo nate pen a kibang den dingin kingaihsun thei hi. Nuntakna anei lote pen tu ni hidan, zingciang zong hidan, tuzawh khakhat ciang koih leng zong hidan mah hiden ding hi. A nungta nate pen nisim kikhel ding hi. Tuabang mahin a nungta Pasian i theihna zong hidan khat beek hiding hi, ci-in kingaihsun thei lo hi. Tuni Pasian pen hidan ahih manin, zingciangin zong hidan mah hi ding hi, cih bangin kingaihsun theilo hi. Johan in hoihtakin na gen hi. Kha Siangtho in na hong sep ciangin huihnung bang mah hi a, a painopna lam pai-in, a nunnopna lam ah nung hi. Kuamah in genkhol thei lo hi. Tuabang mahin kuamah in zong khaam thei lo hi. Ama painopna ah amah pai hi.

Ahih hangin ei Khristian nuntakna ah Peter’ nuntakna tawh kisaiin thalaak ding pen bang hiam cih leh, Peter in a theih Messiah pen Judahte ahih manin, tangthu khempeuh ah sal asemte ahi hi. Amau tangthu enkik ding hi le hang, a gualzawh kum uh ( golden age ) pen cik kum hiam cih leh, David in gam a uk lai tak ahi hi. Tuakhit ciangin amau ii thuneih theihnate mangthang in, a kumpi tutphah uh zong mang hi. Midangte’ khutnuai ah sal-in nasem uh hi. Amau lunggulhna pen bang hiam cih leh, Messiah Kumpi pa hong paikikta hi, tua Messiah in amaute uk ding a, amau galte zawhsak ding hi. Gam khempeuh ah a lian pen gam, minam khempeuh ah a lian pen minam hi ding hi, cih bangin lam-etna nei uh hi. Tua ahih manin Peter in naci hi, “Topa aw, Nang in a nungta Pasian na hi hi. Ahih hangin Peter’ ii upna ah a thanemna pen bang hiam cih leh, Pasian pen khat dan ding bekin ngaihsun thei ahih loh lam, a na theih loh na ahi hi. Ama biak Pasian, a lam- et Pasian, mit muh aa amuh Messiah pen a nungta Pasian ahih lam mangngilh hi. Khrih Zeisu in, gentheihna a thuak dingte, a kimat dingte, ni thum khit ciangin thawhkikna a neih ding thute hoih takin genna na nei hi. Ahih hangin Peter adingin ahi leh, Peter lam-et Messiah pen zaliatna tawh a kidim Pasian, Messiah Pasian, Kumpi pa, Vangliatna tawh a kidim Pasian ahi hi.

Ahih hangin Khrih in Amah leh Amah a kisuah lim pen, nasep sakna (serving servent) hi ci-in, gen hi. Nasem sal bangin ei te’ ading anuntakna hong pia Messiah ahi hi. Peter in Khrih pen a kibang den ding danin ngaihsutna khat koih kha ahih manin Khrih in a lakkhiatnop Messiah a hihna pen muzo nawn lo hi. Adang thu khat om lai hi. Matthew sung mah hi-in, Matthwe 21 ah bang kimu hiam cih leh, Khrih in Jerusalem hong lut-in mite in Amah nadawn uh a “Hosanna! Hosanna! David tapa aw, Pasian’ Min tawh hong paipa Amin thangta hen, phatna ngah ta hen, Hosanna” ci uh hi. ‘Hosanna’ ii a khiatna pen “ kote hong hon in” cih khiatna ahi hi. Nasia takin dawn uh a, a puante uh lampi ah phah in, singkung hiangte phukin dawn uh a, “Hosana! David tapa aw, na Min thangta hen,” ci uh hi. Ahih hangin a lian 17:22 hong tun ciangin, den a lam-etna lianpi tawh puanphah in adawn uh a Pasian uh pen, “Singlamteh ah suang un! Singlamteh ah suang un!” ci-in pulaakna hong nei ta uh hi. Nidangin a genna uh pen “Phatna ngah ta hen,“ hi-in, anunglam a lian 27 ah a genna uh ah “gimna thuak ding hi, Singlamteh tungah suang un!,” ci uh hi. A masa-in “Phatna ngahta hen,” ci-in, anung ciangin “gimna thuak ding hi” ci uh hi. Amasa ah “Hosanna! kote hong honkhia ding pa, hong honkhia in” ci uh a, hih tengah ahih leh “a sih dong that un!” ci uh hi. Banghang hi ding hiam? Amau teel Messiah pen vangliatna tawh galte khempueh a zo ding, hatna tawh mite a zo ding sa uh hi. Tua gumpa pen amau lam-et bangin hong pailoh ciangin, “Singlamteh ah that un, Singlamteh ah that un,” cih hong hita hi. Tua ahih manin tuni-in i gennop thu in, ei’ pulaak Pasian, zanni-in i pulaak Pasian pen tuni adingin koici pulaak ding ihi hiam? Kha Siangtho in eite lam honglak hong hilh mah hiam? Ka Nu ii a lawm in kei hong hilh pen, Paisan in hong theihsak pen, gupkhiatna i ngah leh cidam lohna om lo ding cih telkhiatna hong lakkhia a, ahih hangin tuhun thak ah, i tuahkhak thuthak tungah Pasian in hong lahkik pen Gethsemane huan ah pai ding ahi hi. Singlamteh lampi ah akisap leh izuih ding cih ahi hi.

Eite’ biak Pasian pen a nungta Pasian hi. Nisimin a thak a thakte a hih nuam Pasian hi a, a thakthak theihnate hong pianuam Pasian hi. Amen! Athak athak theih theihnate tawh kum thak ah i kalsuan ding hi. I biak Pasian pen eite in uktheilo hi hangh. Ei’ utdan danin i sawl theih Pasian hilo hi. Khat veivei ciangin hunzat ding i kigin hun om a, khat veivei ciangin phatna leh biakina makaih ding i kigin hun om hi. Mihing ihihna tawh bel hong kikhawm mi khempeuh tha ngahsak nuam hi hangh. Phatna le biakna i makaih ciangin zong hong pai khempeuh khukdin-in, a ki-ap ding uh deih hi hangh. Ahih hangin Pasian pen kitawsawn theilo hi. Kisawl theilo hi. I biak Pasian pen, i telzawh sangin, a khengval ah aom den Pasian ahi hi. Ei’ deih bangin i kaih theih Pasian hi leh a biaktaak Pasian hi lo ding hi. Tuabang pasian mai ah khukdin huai lo hi. Eite’ biak Pasian pen i ngaihsut theihna khengval-in om den hi. Tua ahih manin, kumthak nithak sungah i paiciangin, i biak Pasian pen a nungta Pasian ahih manin tua Pasian pen theihna thak tawh i kalsuan ding kisam hi. Peter bangin ama tel Messiah pen vangliatna tawh Pasian hi mah tase leh, Khrih in a lahkhiat Messiah pen Singlamteh lam pi ahi hi. Singlamteh lampi atawn Messiah ahi hi.

A nihna ah i teel ding a thupi mahmah pen in bang hiam cih leh, ei mihingte si le sa i thanemna ahi hi. Atuam dangin genni ci leng, ciangtanna tawh a om mihingte ihih lam i kitheihtel mahmah ding kisam hi. 2009 kumin Pasian’ thupha tawh ZIV a kici, Tedim pau-in kipau Laisiangtho aw khumna ah vakihel kha hi ingh. Tua tengah Pasian in hong gen thu pen, amasa lamin Rom hong simsak hi. Kei’ Zopau pen zong na siang lua lo dan hi. A diakdiak-in “K” awkaih ah, kei le kei awsiang kakisak hangin makaite’ hong genna ah na siang lualo ahih manin a thupi pen mite panmun panin kei hong hemkhia uh a, a sunga sim dingte hong simsak uh hi. Amasa penin vantungmite tawh kisai munte ka simkha a, “tuni-in David khuapi ah..” cih bangin thu hoih vive ka genkha hi. Vangtungmite mun ah ka omkha hi. A nihna ah, Pilat kumpi panmun ah ahi hi. Amasa bel lungdamna thu genkha in, a nihna ah Khrih a that ding pa’ mun ah hong gensak uh hi. Tuani pen kaciah lam ciangin ka lungsim sungah ngaihsutna tampi hong om hi. Pasian’ thu kagen ciangin thukhenna ka neih hun a om lam hong theisak hi. Khat veivei ciangin Pasian thu kagen hun aom mah bangin, khat veivei ciangin mi’ thu gensiatna cihte kagen hun khawng om thei a, Pasian in tuate hong mukiksak hi. Amasa penin, Khrih in Peter agen pen, nang’ Messiah ci-a nagen pen na lungsim panin hong pai hi lo a, a tung panin hong pai ahi hi. A nunglam ciangin Peter in a pulaak pen, “Topa, hi bang piang kei hen,” acih ciangin tunglam, lam-en loin nuailam i lam-en lua kha hi, ci hi.

Ei pen, line (channel) te dan hi hangh. TV line (channel) ah i khahkhiat nop khempeuh kikhah khia thei hi. Eizong tuadan channel dan hi hangh. Khat veivei ciangin Pasian in Ama kammalte gen dingin hong zat hun aom mah bangin, khat veivei ciangin i gen thute pen Satan’ aw zong na hithei hi. ”Satan aw, keikiang pan kihem khia in,” ci-a i gen hun zong omthei ding hi. Khat veivei i lungsim a hoih hun, i lungsim a siangtho hun ciangin, a hoih Samari mah bangin haksatna a thuakte va huh hi hangh. I neih loh kawmkal ah huh hi hangh. Ahih hangin khat veivei ciang, i lungsimte pen Farisai te tawh kibang hi. Hua mi, hih mite ci-in thu i gen hun om a, Farisai i pian hun om hi. Khat veivei ciangin Lai Siangtho sungah i muh Rahab in Israel thukante a huh mah bangin, haksatna a thuakte ihuh hun om thei hi. Khat veivei ciangin lah, Joseph sanggamte mah bangin, mite’ siatna sungah asawnte hi thei hi hangh. I vek-in mihing maan mah i hih nakleh tuadan ahi dingin hong um ingh. A maan keileh X-Ray khawng kizaih-in “mi mah ihi hiam? cih i sitelkik kul ding hi. Khat veivei ciangin Abraham bangin lenglate zin ado nuam mahmah zong ihi thei a, khat veivei ciangin Sodom khua mite bangin lenglate a bawlsia nuamte zong ihi theizel hi. Khat veivei ciangin meigongnu bangin i neih khempeuh i piak hun om thei a, tuabang mahin, khat veivei ciangin Ananias leh Sapfira bangin Pasian ipiak ding pen ei’ adinga aselsimte zong hi thei hi hangh. Tuni bel thu hoih ahih leh zong hi bek ding hi. Eite pen pan mun tuamtuam tawh a kineihte hi hangh. Upna ah zong galkap mangpi pa danin “Nangma thupiakna tawh dam ding hi, nong paiding kisam lo ding hi. Nangma thupiakna tawh dam ding hi,” cih bang upna i nei a, khat veivei ciangin i upna pen nungzui Thomas bangin “Topa, ka khut tawh lawngin, ka mit tawh kong muh masiah hong um kei ning,” cih bang hunte tung thei hi hangh. Tua pen mihing ihihna ii thanemna hi. Tua panin Pasian in hong gen pen i lunggulh ding hi-a, leitung nate hi loin, a tunglam nate i lunggulh ding cihna ahi hi. I lunggulhte pen i sep, i pau, i kalsuannate ah hong kidawk hi.

Mi khat in thu agen ciangin, tusungin amah’n bang hih hiam, bang sem hiam, leh bangteng tuakkha hiam? cih dotkul lua loin nailang bang i ki-hokhop khit ciangin kithei lel hi. Tuabang mahin e’n bang lunggulh ihiam cih pen i pulaak nate tawh kisai hi. Tua ahih manin tuni-in, kumthak ah i kalsuan ciangin, Pasian pen a thakthak tawh i pulaak ding hong kisam hi. Banghang hiam cih leh, i biak Pasian pen anungta Pasian ahih man ahi hi. Lai Siangtho isim ciangin zong Lai Siangtho lui sung isim ding kisam hi. Tuabang mahin Lai Siangtho thak zong isim ding kisam hi. Amen! Pawlkhat in Lai Siangtho thak simnuam in, Lai Siangtho lui pen deih lualo uh hi. I tel loh tampitak om ahih manin simnuamlo hi hangh. Tua dan hi loin, Lai Siangtho lui sungah thuman thutak alak Pasian i tel keileh, Laisiangtho thak ah a kigelh, itna Pasian ahi, Ama itnate tel zo lo ding hi hangh.

Tua tegel (OT & NT) kigawm in isim masiah Pasian i theihna kicing lo ding hi. Tua ahih manin kum thak ah i kalsuan ciangin athak athak tawh i pulaak ding kisam hi. Ei thu-um mite’ nuntakna pen bang tawh kibang hiam cih leh, Lai Siangtho sungah nakibangci gen hiam cih leh; ei pen monute hi hangh. I mopa pen Khrih hi-in, Khrih pen gumpa-in isan ciangin, i lungsim sungah Kha Siangtho minthuhna hong om in, Kha Siangtho pen i lungsim sungah hong om hi. Tua ahih manin nuntakna icih pen khualzin laitak hi hangh. Khatvei ciang, akicingtakin hong ciahkik ding mopa pen monu in a mopa ding angak, lam-etna tawh a om mah bangin lam en-in i ngak ding kisam hi. Tuahun sungin tuiphumna tawh ahi zongin, Pasiain mai ah Khrih pen i gumpa leh honpa in sanna i lak ding kisam hi. Khatvei bek tuiphum i hih hang in nisimin i pulaak ding kisam hi. Khatvei pulaak khinta ingh, kisam nawn kei, ka ut bangin gen ning, gamta ning, cih dan hi loin, i nuntakna ah nisimin tua Pasian i pulaak ding kisam hi. Mikhat in innkuan tawh kisai bang na at hiam cih leh, “A gualzo kitenna (Successful Marriage) hih nadingin hun tamveipi itna ngah ding kisam hi,” ci hi. Ahih hang, tua hun tamveipi itna pen mikhat bek tawh hi ding hi, cihna hi ci-in na gen hi. Akibang lo mi tungah cihna hi loin, mihing khat tawh tamveipi tak ki-itna hi, ci hi. Tamveipi itna lak ding cihna hi. Tuabang mahin thu-um mite nuntakna ah nop isak hun om a, na isak hun om hi. Alem hun om a, alem loh hun zong om hi. Bangbang a piang zongin Khrih pen nisim-in, i tuah simin a mi kikhel loin “Khrih bekmah Pasian hi,” ci-in i pulaak ding kisam hi. Khatvei pulak khinta ing, kisam nawn kenteh, cih danin kigen thei lo hi. Atawp dong, nuntakna hun abei dong i pulaak ciang bekin gualzawhna khamlukhu a ngah ding ihi hi. Tua pulak nadingin a kisapna pen in, Pasian pen a nungta Pasian ahihna leh ei pen si le sa tawh kibawl pumpi ihih manin nisimin, athak athak tawh leitung nate ngaihsun nawn loin, tunglam nate masuan-in i kalsuan ding ahi hi. Kolose 3:10 ah bang dan-in na kigelh hiam cih leh, “Pasian a kicingtakin i theih semsem nadingin Amah a sun dingin a hong thakbawl tawntung ahi hi,” ci-in na gen hi. Pasian lim le mel pen athak athak-in puahna angah cihna hi-in, a gennopna ah, a thakthak theihna tawh theih ding kisam hi. Lai Siangtho lui sim loin, a thak bek isim leh ci om lo meh tawh kibang ding hi. Tuabang mahin Lai Siangtho lui bek simin, a thak isim keileh Pasian’ itna mu loin, Pasian pen a lauhuai thukhen pa cih danin mu ding hi hangh.

Tua ahih manin i biak Pasian pen thukhen mangpi pa danin, thu man a ngen Pasian ahih mah bangin hunkhat sung mahin a itna a honglak Pasian ahi hi. Tua tegel i telna pen nisim-in athak athak tawh i pulaakna hi. Lai Siangtho lui sunga Pasian pen a gamla aom Pasian ahih hangin, Lai Siangtho thak sunga i tel Pasian, Khrih tungtawnin a ki-lak Pasian pen “Emmanuel“ eite tawh hong omkhawm Pasian ahi hi. Tua tegel a ki-lekin i tel ding kisam hi. Khrih hong hilh thungetna ah Khrih in hong hilh pen “Nisim ka nuntak nading uh an hong pia in” ci-a, a thakthak tawh i pulaak zawh nadingin “Pasian aw, athak athak theihnate hong pia in; tuni adingin akicing Nangmah theih nadingte hong pia in; zingciang adingin a kisam ding Nangmah theihnate zong hong pia in,” cih bangin thu i nget ding kisam hi. Tuadan ihih keileh Peter bang mahin alui ah omsuak-in athak hong kilak dingte a thei lote hi thei ding ihih manin, athak theihnate tawh i nuntak ding hong zawn nuam ingh.