+9512304629 No. 156A, BAHO ROAD, SANCHAUNG TSP., YANGON, MYANMAR

Tedim Christian College

Jesuh Khrih Ah Semkhawm Ni

I biak Pasian ahi Pa Pasian,Tapa Pasian, Kha Siangtho Pasian pen a kipatcil pan tuhun, a tontung in a kipden na semkhawm thumgawm Pasian ahihi. Sepkhopna tawh leitung piang sak a mawhnei mite honkhia in dawimangpa gam sukham in Pasian gam hong phut hi. Mihing tate zong ki lungtuak in a sepkhawmna mun ah Pasian lungkim in gualzawhna piangsak denhi.

Jericho a pukna (Joshua 6)
Jericho kulhpi pen acre 8 bang zai in asanna pi 50, agolna pi 30 bang kici hi. Hih khuapi pen Joshua makai in Isreal ten a sim ding hita hi. Leitung lam pan lau huai mahmah kihtak huai mahmah hi. Ahizong Pasian in Joshua tungtawn in thupia khin a,kuamah tangpek lo in tuamtat lo uh ahihman in Jericho kulhpi kimvel in Siampiten pengkul nakpi tak in tum in a kisawl bang in mipite nakpi takin hong awt uhciang kulhpi kicim ziahziah mawk hi. Amau mummun pan ma pangkhawm in hong semkhawm a hihman in Jericho hong la zo uhhi. A tuamtat khat peuh om leh Ai khua neu a lelh uh bang kha ding uhhi. Ki thutuak in sermkhawm ahih manin gualzawhna a mau khut sung ah Topan pia pah hi.

Kial pan suahtakna (2Kings7)
Siria kumpi in Samaria hong umcihna hangin nakpi takin gamsung ah kial hong tung a, haksa mahmah in nek ding om nonlo a hihman, a tate sa nagawn hong ne ta zen uhhi.Tua hun laitak in lamet bei miphak 4te kulh kongpi lutna ah tu khiukheu in thu hong kikum uhhi. Khuapi sung lut leh lah kial tung,a omna uh ah om suak leh lah si veve ding hi mawk a hihman in a 4 un lungkim in sih leh sih ci-in Syria galkapte phual zuan in hong pai khia uhhi. Pasian in ki lungtuak in miphakte paina pen Syria galkapte bil ah galkap honpi khe ging bang in zasak zen hi. Isreal kumpi in Hit kumpi leh Egypt kumpi cial in hong kuan hi ci-in lau mahmah uh ahih manin taw zut liang in hong nawhtai mahmah uhhi. Hih miphakte sepkhopna hang in a puksi ding tampiten suahtakna hong ngah uhhi. Ei i neu mahmah hang ki thutuak in semkhawm hileng na lian mahmah ki sem zo lua hi cih hong phawk sak peuhmah hi.

Topa Jesuh in Pasian gam a kiphuh zawhna ding in akhaktan a liah den kulhpi pen a ki sukkhap zawhna ding a mite ki pumkhat in a sepkhop loh uh phamawh ahih lam thei pha mahmah ahih manin Pa aw eite nih pumkhat i hihmah bangin amaute zong pumkhat a hih theih nading thu kong nget sak hi ci-in thum ngaungau mawk hi. Tuamah bangin Sawltak Paul in zong Khrih pumpi ahi Pawlpi sung ah thu-ummite sepkhop ding thupi sa mahmah a, sepkhopna lo tawh zawhna omlo cih thei lua ahih manin Pasian hong piak siamnate zangkhawm in semkhawm ni hong ci geugau leuleu hi.

Tedim Tuiphum Pawlpi-Yangon in 2017 kum i thubulphuh pen Khrih sung ah picinna hi a, Pawlpi mi khempeuh in phattuam pih mahmah dingin ka um takpi hi.Tua ahihmanin tua i picinna pan kal khat suan in semkhawm dih ni. Eite Khrih sung ah ki pumkhat in semkhawm tagial leng Pasian gam kiphuh nang a khak tante kicim ding a,Kha gilkial taksa gilkial lungleng khuangai tampi ading nuntakna hi taktak ding hihang. Semkhawm liailiai ni,Pasian gam kek dihni. Pawlpi mi khempeuh tung ah Topa thupha maw.

Note tawh na semkhawm
Rev. Cin Sian Pau, Church Pastor